အစိုးရပိုင် မြန်မာ့ဆက်သွယ်ရေးလုပ်ငန်းက ဂျီအက်စ်အမ်ဖုန်းလိုင်းပေါင်း သန်း ၃၀ ကို လာမည့်ငါးနှစ်အတွင်း တိုးချဲ့ချထားမည်ဖြစ်ရာ ထိုစီမံကိန်းကြောင့် မိုဘိုင်းဖုန်းနှင့်သက်ဆိုင် သည့် စီးပွားရေးလုပ်ငန်းများ တိုးတက်ကျယ်ပြန့်လာဖွယ်ရာရှိကြောင်း ကျွမ်းကျင်သူများက သုံးသပ်ပြောကြားသည်။ စီမံကိန်းပထမနှစ်တွင် ဖုန်းလိုင်းရေ ၄ သန်း၊ ဒုတိယနှစ်တွင် ၅ သန်း၊ တတိယနှစ်တွင် ၆ သန်း၊ စတုတ္ထနှစ်တွင် ၇ သန်းနှင့် ပဉ္စမနှစ်တွင် ၈ သန်း တိုးချဲ့တပ်ဆင် မည်ဖြစ်ကြောင်း ဆက်သွယ်ရေး၊ စာတိုက်နှင့် ကြေးနန်းဝန်ကြီးဌာန ပြည်ထောင်စုဝန်ကြီး ဦးသိန်းထွန်းက ပြီးခဲ့သည့်လကုန်ပိုင်းက ပြောဆိုခဲ့သည်။ ဂျီအက်စ်အမ်ဖုန်းလိုင်းများ တိုးတက်များပြားလာပါက မိုဘိုင်းဖုန်းဟန်းဆက်ရောင်းဝယ်ရေး စီးပွားရေးလုပ်ငန်းများလည်း ပိုမိုကျယ်ပြန့်လာပြီး ကွန်ပျူတာစီးပွားရေးလုပ်ငန်းများကဲ့သို့ အောင်မြင်လာဖွယ်ရာရှိကြောင်း ကျွမ်းကျင်သူများကဆိုသည်။ လူကြီးမင်းဖုန်းဟန်းဆက်အရောင်းဆိုင် အထွေထွေမန်နေဂျာ ဦးကိုကိုအောင်က “ဂျီအက်စ်အမ်က သုံးလို့လည်းကောင်းတဲ့အတွက် အာရုံစိုက်မှုပိုမိုလာနိုင် တယ်။ အရင်က လိုင်းမမိတဲ့နေရာတွေလည်း မိလာနိုင်တယ်။ ဒါမှစိတ်ဝင်စားမှုပိုလာပြီး ဈေးကွက်ကကြီးထွားလာမှာပါ။ တန်ဖိုးနည်းဟန်းဆက်တွေ ပိုပြီးရောင်းလာရနိုင်တယ်။ အရောင်းဆိုင်အရေအတွက်ကတော့ ချထားပေးမယ့်ဒေသတွေပေါ်မှုတည်ပြီး တိုးလာနိုင်တယ်။ ရန်ကုန်မှာတော့ အခုနောက်ပိုင်း ဆိုင်တွေသိပ်တိုးမလာတော့ဘူး။
နယ်တွေမှာတော့ အီလက်ထရွန်နစ် ဆိုင်တွေကအစ ဟန်းဆက်တင်ပြီး ရောင်းလာတော့ အရောင်းဆိုင်တိုးတယ်ပြောလို့ရတယ်” ဟုပြောသည်။ မိုဘိုင်းဖုန်းဟန်းဆက်ဈေးကွက်သည် ၂၀၀၉ ခုနှစ်တွင် မြန်မာ့ဆက်သွယ်ရေးလုပ်ငန်းနှင့် စင်ထရယ်လ်မားကက်တင်း ကုမ္ပဏီတို့ပူးပေါင်း၍ ထုတ်လုပ်ရောင်းချခဲ့သည့် တစ်ခါသုံးကြိုတင်ငွေပေး ကတ်များ စတင်ဈေးကွက်တင်ချိန်မှစ၍ သိသာစွာဖွံ့ဖြိုးလာခဲ့ပြီး လက်ရှိတွင် ရန်ကုန်မြို့တစ်မြို့ထဲ၌ပင် မိုဘိုင်းဖုန်းဟန်းဆက်အရောင်းဆိုင် ၂၀၀ ၀န်းကျင်အထိရှိလာခဲ့ကြောင်း သိရသည်။ ACE မိုဘိုင်းဖုန်းဟန်းဆက်အရောင်းဆိုင် တာဝန်ရှိသူကိုသန်းထိုက်က “လက်ရှိရောင်းအားမှာတော့ စီဒီအမ်အေ ၈၀၀ မဂ္ဂါ ဟတ်ဇ်မိုဘိုင်းဟန်းဆက်တွေက ပိုရောင်းကောင်းတယ်။ အခုလက်ရှိ ကျပ်ငါးသိန်းတန်ဂျီအက်စ်အမ်တွေကို ချထားပေးပေမယ့်လည်း ဈေးကွက်ကလိုက်မပြောင်းဘူး။ လူတွေက လိုင်းပိုမိတဲ့ဖုန်းလိုင်း၊ သုံးစွဲ လို့ရတဲ့နယ်မြေအရေအတွက်နဲ့ အင်တာနက်လိုင်း သုံးလို့ရ၊ မရဆိုတာကို ပိုပြီးစိတ်ဝင်စားကြတယ်။ အခုဂျီအက်စ်အမ်လိုင်းဝယ်တဲ့သူတွေက တစ်ခါသုံးကတ်တွေသုံးခဲ့စဉ်က ဖုန်းဝယ်ပြီးသူတွေဖြစ်တော့ ဈေး ကွက်မှာလိုက်ပြီး ပြောင်းလဲမလာဘူး။ စီဒီအမ်အေနဲ့ ၈ျီအက်စ်အမ်ကသွင်းတဲ့ လမ်းကြောင်းချင်းမတူဘူး။ ၈ျီအက်စ်အမ်က ဈေးကွက်ဖြစ်လာရင်တောင် တင်သွင်းလုပ်ကိုင်သူအရေအတွက်က အနည်းငယ်လောက်ပဲ ရှိနေမှာပါ” ဟုသုံးသပ်သည်။ ဈေးကွက်ဝယ်လိုအားမှာ ကျယ်ပြန့်လာဖွယ်ရာရှိသော်လည်း မိုဘိုင်းဖုန်းရောင်းဝယ်ရေး စီးပွားရေးလုပ်ငန်းများအနေဖြင့် လုပ်ငန်းတိုးချဲ့ရာတွင် သေချာစွာဆောင်ရွက်သင့်ကြောင်း ကျွမ်းကျင်သူများကအကြံပြုသည်။ Alpha Info Tech ကုမ္ပဏီအမှုဆောင်အရာရှိချုပ် ဦးရဲမြတ်သူက “ဖုန်းလိုင်းတွေကလည်း ချထားပေးဦးမယ်ဆိုတော့ ပိုမိုကောင်းလာစရာရှိတယ်။ ဒါပေမယ့်မြန်မာပြည်မှာ Statistatics မရှိတော့ အားလုံးပြုံပြီးတိုးတက်ကြတယ်။ ပြီးရင်မပြိုကွဲတဲ့သူလောက်ပဲ ကျန်တော့တာကိုလည်း တွေ့ရတယ်။
လက်ဝါးကြီးအုပ်ချင်တဲ့ စီးပွားရေးသမားတွေကတစ်မျိုး၊ အထင်နဲ့လုပ်နေသူတွေကတစ်မျိုး ရှိကြမှာပဲ။ ဒီကြားထဲမှာ အဖြေမှန်မှန်းနိုင်တဲ့သူတွေပဲ ကျန်ခဲ့ကြမှာပါ” ဟုပြောသည်။ မိုဘိုင်းဖုန်းလိုင်းများ ပိုမိုတိုးချဲ့ချထားပေးသောကြောင့် ဟန်းဆက်အရောင်းဈေးကွတ် ပြောင်းလဲလာနိုင်သော်လည်း မိုဘိုင်းဆော့ဖ်ဝဲဈေးကွက်မှာမူ ပြောင်းလဲလာနိုင်ချေနည်းပါး ကြောင်း၊ Payment Gateway များရှိလာခဲ့ပြီး မိုဘိုင်းဟန်းဆက်သုံးစွဲသူ များပြားလာခဲ့ပါက မိုဘိုင်း Commerce အနေဖြင့် ပေါ်ပေါက်လာနိုင်ကြောင်း ဦးရဲမြတ်သူက ဆိုသည်။ “မိုဘိုင်းနဲ့ပတ်သက်လို့ ဆော့ဖ်ဝဲဈေးကွက်ကတော့ Law Infrastructure မရှိရင် ဘာမှတော့ ဖြစ်လာဦးမှာ မဟုတ်သေးဘူး။ မိုဘိုင်းဖုန်းတွေပေါလာရင် ခရီးသွားလာရေးကုန်ကျစရိတ်တွေနဲ့ မလိုလားအပ်တဲ့ကုန်ကျစရိတ်တွေတော့ လျှော့ချလာနိုင်မယ်” ဟု၎င်းကပြောသည်။ လူဦးရေသန်း ၆၀ ၀န်းကျင်နေထိုင်သော မြန်မာနိုင်ငံတွင် လက်ရှိတွင် မိုဘိုင်းတယ်လီဖုန်း လိုင်းအင်အား ၂ သန်းကျော်ကို အသုံးပြုလျက်ရှိပြီး အော်တိုတယ်လီဖုန်းလိုင်း များနှင့်စုပေါင်း၍ တယ်လီဖုန်းသိပ်သည်းဆကို တွက်ချက်ပါက ၅.၄ ရာခိုင်နှုန်းတွင်ရှိကြောင်း၊ စီဒီအမ်အေ ၄၅၀ မဂ္ဂါဟတ်ဇ်မိုဘိုင်းဖုန်းလိုင်း ငါးသိန်းရှစ်သောင်းကျော်၊ စီဒီအမ်အေ ၈၀၀ မဂ္ဂါဟတ်ဇ်ဖုန်းလိုင်း နှစ်သိန်းခွဲ၊ ဒဗလျူစီဒီအမ်အေ ဖုန်းလိုင်း ၂၈,၀၀၀ နှင့် ဂျီအက်အမ်မိုဘိုင်းဖုန်းလိုင်း လေးသိန်းရှစ် သောင်းကျော် ချထားပေးခဲ့ကြောင်း မြန်မာ့ဆက်သွယ်ရေးလုပ်ငန်းက ဇန်န၀ါရီလတွင်ထုတ်ပြန် ကြေညာခဲ့ကြောင်း သိရသည်။ Ref:Internet Journal
No comments:
Post a Comment